A Garda Civil vén de notificar que xa se atopou o corpo do bañista que saltara á auga desde o pantalán do club náutico de Ponte Mourulle, no municipio de Taboada (comarca de Chantada). O falecido apareceu ás 13.05 horas desta cuarta feira e foi rescatado por mergulladores do GEAS Xixón, que o levaron até o embarcadoiro. Xa se deu aviso á autoridade xudicial.
Segundo trasladan desde o 112-Galiza, o falecido, un home duns 60 anos de idade, foi localizado perto de onde se botara a nadar. Sobre as 19.30 horas desta terza feira varios particulares púñanse en contacto coa central de emerxencias para alertar de que viran como afundía o bañista.
Algunhas persoas que estaban alí rastrexaron a zona para tentar dar con el mentres o 112 daba o aviso á Garda Civil, o GES de Monterroso e Urxencias Sanitarias-061, que mobilizou o helicóptero medicalizado e unha ambulancia. Finalmente, o corpo foi recuperado esta mesma mañá após un amplo operativo de procura.
Outro desaparecido en Belesar
Aínda continúa activa a procura do outro desaparecido no encoro de Belesar, un mozo pescador que afundiu após precipitarse á auga do río Miño no municipio do Páramo cando tentaba recuperar a súa cana. A esta procura incorpóranse drons da Axencia Galega de Emerxencias (Axega).
Tamén nas últimas horas, por parte do 112-Galiza, xestionouse a intervención do grupo de atención psicolóxica Gipce, do Colexio de Psicólogos da Galiza, para ofrecer axuda especializada á familia do desaparecido.