A Rapa das Bestas de Sabucedo, na Estrada (Tabeirós-Terra de Montes), xa conta coa protección de ben de interese cultural (BIC) de patrimonio inmaterial ao publicar esta cuarta feira o Diario Oficial da Galiza (DOG) a resolución do Goberno galego pola que dá inicio a este procedemento.
A incoación do expediente foi anunciada en xuño polo propio conselleiro de Cultura, José López Campos, na presentación desta festividade que xa en 2007 foi declarada de interese turístico internacional. En concreto, este ano celebrarase entre esta sexta feira, 5 de xullo, e a segunda feira 8 de xullo.
O procedemento deberá resolverse nun prazo máximo de 24 meses -dous anos- a partir desta cuarta feira. Así, a Rapa das Bestas de Sabucedo xa aparece inscrita de forma preventiva no Rexistro de BIC da Galiza e comunicarase ao Estado español para que faga o mesmo no seu Inventario Xeral do Patrimonio Cultural Inmaterial.
A protección BIC englobará non só a propia rapa, senón tamén a 'Misa na Alborada' e o camiño previo cara ao 'curro', recinto onde se leva a cabo o corte das crinas por parte dos 'aloitadores'.
De acordo coa resolución asinada pola directora xeral de Patrimonio Cultural, María del Carmen Martínez Ínsua, a Rapa das Bestas é a "manifestación inmaterial máis clara que existe na Galiza da relación ancestral entre uns animais, neste caso, os cabalos, e os seres humanos".
Esta cerimonia "permitiu" que esta emblemática especie silvestre, "fundamental para a conservación dos ecosistemas de media montaña na Galiza", puidese sobrevivir ao longo dos séculos como "unha das máis representativas das que quedan en todo o mundo".
"A rapa é, por tanto, testemuña dunha actividade de manexo dun ecosistema, do que forman parte as bestas do monte, a través dunha serie de prácticas ancestrais", subliña a resolución, que tamén pon o foco no seu "valor cultural singular" na Galiza por manter "o respecto pola tradición e polos rituais, que foron e son transmitidos de xeración en xeración, polo menos durante os últimos tres séculos".
Neste contexto, as medidas das que goza un ben BIC comprometen ás Administracións Públicas a garantir a súa viabilidade, fundamentalmente a súa identificación, documentación, rexistro, investigación, preservación, protección, promoción, valorización, transmisión e revitalización. Por tanto, ordenarase o arquivo e a sistematización dos documentos e outros materiais relacionados con este patrimonio, así como a difusión deste coñecemento.
