A valedora do Pobo, María Dolores Fernández Galiño, lembrou á Xunta da Galiza a obrigatoriedade de resposta que ten ante unha queixa presentada pola Comisión pola Recuperación da Memoria Histórica (CRMH) da Coruña pola ausencia de visitas á Casa Cornide, propiedade da familia Franco e que foi declarada Ben de Interese Cultural (BIC) en maio de 2023.
Esta consideración, que determina a súa apertura ao público xeral para visitas, non está a ser cumprida máis dun ano despois, polo que a entidade memorialística da cidade herculina presentou a mediados de abril unha queixa formal ante o Alto Comisionado do Parlamento galego para que intercedese ante a Consellaría de Cultura ante o incumprimento da lei que obriga ás propiedades de BIC a permitir visitas durante, polo menos, catro días ao mes.
Nunha resposta facilitada pola CRMH da Coruña, a valedora recoñece que o Goberno galego non remitiu o informe sobre os motivos polos que permanece fechado a visitas o inmóbel e engade que, a través dun escrito, lembrouse á Xunta a obrigatoriedade que marca a normativa de responder os requirimentos deste tipo.
A entidade reclamante subliña que a lei obriga aos titulares de bens declarados de interese cultural a permitir a súa visita pública gratuíta durante, polo menos, catro días ao mes por un espazo de catro horas, algo que, como inciden, os herdeiros e as herdeiras do ditador non están a cumprir.
A CRMH da Coruña denuncia ademais o "xa prolongado incumprimento das obrigacións legais" dos propietarios e propietarias da Casa Cornide, unha negativa que ve "amparada" pola Xunta.
Trámite para a recuperación
A alcaldesa da Coruña, Inés Rei, confirmou esta cuarta feira o inicio do expediente para anular as resolucións administrativas "que deron lugar ao espolio" da Casa Cornide, actualmente propiedade da familia Franco, de cara a recuperar a súa "titularidade pública". Faino logo de que, en setembro de 2019 –xa no pasado mandato–, o Pleno aprobara unha moción do BNG na que se instaba o Goberno local a interpor unha demanda contra a familia do ditador.