Os sindicatos avisan de que "os peores datos" en relación ao mercado de traballo "están por chegar", polo que urxen "verdadeiras políticas activas de emprego" e reclaman á clase gobernante "responsabilidade fiscal". Pola súa parte, as e os autónomos ven "tinguiduras dramáticas" na evolución do desemprego, mentres empresarios constatan a "desaceleración" ante a "enorme incerteza".
Por unha parte, o secretario de emprego da CIG, Francisco González Sío, relaciona as cifras de setembro coa "falta de políticas públicas efectivas para paliar a crise que golpea de cheo a clase traballadora". "Esta ausencia de medidas implica que afrontamos o cuarto trimestre do ano nunha situación peor cando en teoría os peores datos aínda están por chegar", alerta.
Neste senso, pon o foco no "empobrecemento xeneralizado" da clase traballadora polos "baixos salarios" e a inflación. Aliás, apunta ao "problema" xerado pola paralización da negociación colectiva.
Namentres, UXT sinala o "peor comportamento" do paro na Galiza e á "difícil situación" das persoas desempregadas, xa que "máis da metade perciben prestacións non contributivas". "Agora que se xera emprego de calidade, a prioridade é acabar co desemprego", sentencia, após indicar que houbo un "moi bo dato" de contratación indefinida, de 35,5%.
Cos orzamentos "ás portas", esta organización considera que "urxe dotar os servizos públicos de emprego de recursos e impulsar verdadeiras políticas activas de emprego".
CCOO, noutra orde de asuntos, lamenta os "malos datos" de setembro e insta á "responsabilidade fiscal" da Xunta. Aliás, entende que "é o momento de aumentar os salarios para que a clase traballadora poida facer fronte á situación" e pide "arrimar o ombreiro" aos que máis teñen.
Autónomos e empresarios
Para Eduardo Abad, presidente de UPTA España, "o pequeno comercio non resiste" e é preciso "adoptar medidas urxentes para paliar a crítica situación". "Ou as administracións interveñen ou non se poderá frear o desastre e miles de autónomos quedarán na ruína", asegura. A evolución do emprego autónomo na Galiza adquire "tinguiduras dramáticas", segundo a federación de autónomos do país.
Por último, empresarios de Ourense constatan que "o mercado laboral comeza a dar signos de desaceleración nun contexto de enorme incerteza, con tres meses seguidos á alza, o que está a frear o emprego mentres as empresas se esforzan por recuperar a normalidade, pero ven a súa capacidade de contratación mermada nun escenario sacudido pola crise enerxética, alza nos prezos de subministros e os problemas derivados do conflito bélico [en Ucraína]".
