Unha trintena de atletas galegos e galegas toman parte desde esta sexta feira no Campionato de España absoluto que se disputa na localidade alacantina da Nucía, un certame no que destaca a presenza de catro dos representantes do país no último Europeo de atletismo, desenvolto recentemente en Roma (Italia).
Os metais non se fixeron esperar, pois xa na mañá da sexta feira Antía Chamosa abriu o medalleiro galego grazas á súa gran actuación nos 10 quilómetros marcha, proba na que a novísima Aldara Meilán, de tan só 17 anos, foi cuarta, ficando moi cerquiña dun podio que completaron Lidia Sánchez-Puebla (terceira) e Raquel González (primeira).
Ademais, e salvo sorpresa maiúscula, a Galiza debería levar polo menos unha medalla máis no Estatal de Atletismo, pois a flamante campioa de Europa de triplo salto, Ana Peleteiro, comezaba o seu concurso nun torneo que xa conquistou en seis ocasións anteriormente ás 21.10 horas da sexta feira, rematando fóra.
Pola súa parte, Belén Toimil, outro dos grandes nomes propios na actualidade e vixente plusmarquista estatal do lanzamento de peso, debe confirmar o seu extraordinario momento de forma -que a levou a ser quinta no Campionato de Europa- co seu quinto título de España consecutivo, cetro que porá en xogo a partir das 12 horas do domingo.
Máis complicado que a mugardesa para subir ao máis alto do caixón o terá o viveirense Adrián Ben, quen defende a coroa dos 800 metros lisos, no seu caso tamén o domingo, mais ás 13.30 horas. Pese a acreditar a mellor marca de entre todos os contendentes (1.44.41), Ben terá ante si un amplo elenco de atletas de primeira orde mundial, entre os cales brillan o bronce europeo Mohamed Attaoui; o campión do mundo en pista cuberta Mariano García; ou o sempre combativo Álvaro de Arriba
Ademais, e pese a non chegar coa vitola de favoritas e favoritos nas súas respectivas categorías, Carmen Sánchez na xavelina, María Ezquerro no lanzamento de disco, Uxía Pereira nos valos, Mauro Triana nos 100 metros ou El Mehdi El Nabaoui nos obstáculos poderían dar a sorpresa.
