Un total de 21 padexeiros e padexeiras galegas xa están na capital de Eslovaquia, Bratislava, para participar no Campionato de Europa de Piragüismo das categorías júnior e Sub-23, onde se retarán deportistas procedentes de 36 países diferentes.
Alí, desde esta sexta feira e até o domingo, 30 de xuño, os e as representantes da Galiza buscarán conquistar o maior número de metais posíbeis, comezando por Lucía Tenreiro (Club Piragüismo Illa de Arousa) e Natalia Moreira (Escola de Piragüismo Cidade de Pontevedra), quen serán da partida no K4 500 metros xunto coa asturiana Yaiza Novo e a estremeña Claudia Blanco.
Pola súa parte, Irene Lata (Ría de Betanzos) opta a todo no K1 500 metros e o K4 500 metros, no que será a cota galega dunha embarcación que completan María Pájara, Daniela García e María Reus. Polo contrario, o K2 500 estará copado integramente pola Galiza, concretamente polas padexeiras do Caiac Tudense Lucía Soutelo e Uxía Rodríguez.
Cambiando o caiac pola canoa, Lara Remigio (Náutico O Muiño) unirá forzas coa madrileña Candela Mayoral nas probas de C2 500 e 200 metros na categoría xuvenil, mentres que a pontevedresa Claudia Couto afrontará en solitario o reto do C1 500 metros Sub-23.
E, para rematar o apartado referente ás mulleres, Alba Rodríguez (Piragüismo Poio) disputará o C2 200 metros con Elena Gómez e Antía Otero (EP Cidade de Pontevedra) o C2 500 con María Moreno.
No referente aos varóns, Manuel Pousa (Club de Mar Ría de Aldán) competirá no K1 200 metros xuvenil, mentres que Manuel López (Caiac Tudense) fará o propio no K2 500 metros grazas á axuda de Juan Gómez ; Óscar Allegue (Náutico Firrete) compartirá piragua con Víctor Pizarro, Diego Muñoz e Rubén Escudero no K4 500 metros.
Mauro Domínguez (Piragüismo Verducido) representará o país no K2 500 metros -xunto a Miguel Serrano- e Manuel Rivas (Caiac Tudense) competirá no K4 500 metros na compañía de Ernesto Goribar, Rubén García e Ricardo García.
Finalmente, na modalidade de canoa tamén haberá unha ampla presenza galega: Nicolás Braña (C1 200), Raúl Fernández (C2 1.000), Jairo Zurita e Martín Expósito (C2 500), Pedro Torrado (C2 1.000), Manuel Fontán e Martín Xácome (C2 500).
