Apenas cinco días despois de que Alemaña e Escocia (5-1) declarasen oficialmente inaugurada a Eurocopa esta entra hoxe na súa segunda quenda de partidos dentro da primeira fase. Deste modo, tanto a propia Escocia como Hungría -que tamén caeu derrotado na súa estrea, por 3 a 1 ante Suíza- están obrigadas a sumar canto menos un punto se non queren tornar nos primeiros conxuntos en dicir adeus ao torneo.
Os maxiares son os que, sobre o papel, o teñen máis complicado, por colidir (Stuttgart Arena, 18 horas) cun combinado teutón que asustou no seu debut. Con todo, a realidade é que os anfitrións non foron quen de superar os húngaros nos seus tres últimos enfrontamentos oficiais.
Máis esperanzas de éxito albergan no seo da Tartan Army, a buliciosa afección escocesa, que demostrou fóra do terreo de xogo durante a pasada sexta feira que está un chanzo por enriba dos seus representantes sobre o céspede. Por iso o técnico Steve Clarke, após recoñecer que se equivocou "en moitas cousas" contra Alemaña, conta con que no duelo con Suíza (Cologne Stadium, 21 horas) teñan "moito máis o balón" e sexan quen de "crear ocasións no outro extremo do campo".
Ademais, a xornada depara un terceiro encontro, neste caso correspondente ao Grupo 'B', entre Croacia e Albania (Volksparkstadion, 15 horas). Nunha situación análoga á de escoceses e húngaros logo de perder ante España e Italia, respectivamente, todo o que non sexa vencer os seus modestos veciños suporía unha hecatombe para a Croacia de Modric e compañía.
O Celta comeza a Liga ante o Deportivo... Alavés
Fóra do fútbol de selección, a Real Federación Española de Fútbol (RFEF) levou a cabo esta terza feira o sorteo do calendario da tempada 2024/25 na Primeira División.
O único representante da Galiza na máxima categoría, o Real Club Celta, debutará na fin de semana do 18 de agosto como local ante o Deportivo Alavés, baixando o pano do campionato como visitante en Xetafe o 25 de maio.