Arredor de 380.000 galegos e galegas non decidiron a quen votarán nas eleccións do 23-X

A campaña electoral enfía os días máis decisivos. A tan só catro xornadas da cita coas urnas, as formacións políticas axustan as súas tácticas co obxectivo de mobilizar o electorado e decantar as persoas indecisas. Neste sentido, entenden que calquera resultado final é posíbel, dado o elevado número de votantes que non decidiron aínda o seu voto, fundamentalmente entre os menores de 44 anos. A este respecto, as organizacións políticas consideran o escenario aberto e sitúan Lugo e Ourense como demarcacións chaves para o resultado final no conxunto do Estado español. As sondaxes publicadas na segunda feira, último día autorizado pola normativa electoral para difundir enquisas, situaron os votantes indecisos en arredor de 17,2% do total do corpo electoral. Nesta liña, indican que perto de 380.000 galegas e galegos que teñen decido acudir a votar aínda non elixiron a formación pola que optarán o 23 de xullo. A este respecto, o índice de indecisos variaría en función das circunscricións, sendo máis elevado en Lugo e en Ourense e máis reducido na Coruña e Pontevedra. Asemade, as enquisas avanzan unha maior indecisión na Galiza que no conxunto do Estado, de maneira que a porcentaxe é 5% maior no caso galego. As circunscricións A maior porcentaxe de electores indecisos, segundo os datos fornecidos polas últimas sondaxes publicadas, sitúanse na circunscrición de Lugo, con aproximadamente 22% do censo. A continuación colócase Ourense, con perto de 19%, seguida de Pontevedra con 14% e da Coruña con 13%. Malia que o número de persoas que non decidiron o sentido do seu voto é inferior ao dos anteriores comicios estatais, fundamentalmente pola data escollida para as votacións e polo incremento do voto por correo, continúa a ser unha cifra suficientemente elevada para determinar o reparto de escanos na totalidade dos distritos electorais. Estes últimos días de campaña son determinantes para decantar o sufraxio do electorado indeciso. Así, por exemplo, os estudos postelectorais elaborados por diversas empresas demoscópicas após os comicios estatais de 2019 concluíron que o 24% da poboación galega decidiu o seu sufraxio durante a campaña electoral. Concretamente, sinalaban que 10,9% do electorado escolleu o seu voto durante os días de campaña electoral e 13,1% entre a xornada de reflexión e o propio día das votacións. O contexto é semellante ao dos comicios locais do pasado 28 de maio. Segundo os datos fornecidos pola empresa Sondaxe, cuxo tracking adquiriron boa parte das forzas políticas do país, 22% dos electores, isto sería 330.190 persoas, decidiron o seu voto durante a propia campaña, situándose o último día de campaña o número de indecisos na Coruña, Compostela e Ourense en arredor de 22% e superando en Lugo a porcentaxe do 23%. Precisamente, estas bolsas de votantes protagonizaron, finalmente, algunhas das principais sorpresas da campaña. Menores de 45 anos O maior índice de persoas indecisas atópase entre a poboación de 18 e 44 anos. A este respecto, o barómetro do Centro de Investigacións Sociolóxicas (CIS) do mes de maio sinalou que 10,2% da poboación entre 18 e 24 anos e 6,2% do grupo de idade entre 25 e 34 anos deciden o seu voto o día da xornada de reflexión. Nesta mesma liña, destacou que 5,6% das persoas menores de 25 anos e 4,8% das incluídas entre 25 e 34 anos determinan o seu sentido de voto no propio día das eleccións. Nesa dirección, os politólogos consideran que 70% das persoas de entre 18 e 44 anos deciden o seu voto durante a campaña electoral. BNG, PSOE e Sumar traballan de maneira particular esa franxa de idade. As tres forzas rexistran nese segmento do electorado as mellores porcentaxes de voto, recollendo os nacionalistas nos comicios galegos de 2020 o 56% dos sufraxios entre a poboación de 18 e 29 anos e o 31% entre as persoas de 30 a 44 anos. Na mesma liña, a organización liderada por Ana Pontón situou o foco nos primeiros votantes, onde diferentes sondaxes sitúan o nacionalismo galego como primeira opción de voto. As sondaxes publicadas no última día legalmente permitido para a súa difusión en prensa estiman a participación en arredor de 64%. Trátase dunha porcentaxe moi semellante á dos comicios estatais de 2019, cando rexistrou un índice de 66,6%, situándose perto de sete puntos por baixo da media do Estado. Neste sentido, as cifras difundidas desmenten aquelas hipóteses que apuntaban a unha caída nos sufraxios como consecuencia da data escollida para os comicios. A falla de coñecer os resultados definitivos, todo apunta a unha abstención na liña das eleccións de 2019. As perspectivas dun escenario electoral aberto explican a alta mobilización das formacións políticas nestes últimos días de campaña. Un caso paradigmático é o de Lugo, onde diversas enquisas sitúan en disputa o terceiro deputado do PP co segundo do PSOE e co primeiro do BNG. A presenza de Pedro Sánchez na cidade das murallas o penúltimo día de campaña dá conta do alcance da batalla nunha circunscrición que, con Ourense, semella chave no reparto final de escanos entre os bloques en confrontación. Resultará chave, neste sentido, a capacidade das forzas nacionalistas e de esquerdas para decantar o voto indeciso e mobilizar o sufraxio das persoas menores de 45 anos 472.007 persoas con dereito a voto na Galiza non residen no país As eleccións de 23 de xullo son as primeiras que se desenvolven desde a reforma electoral que puxo fin ao voto rogado, polo que se agarda un incremento de voto do coñecido como Censo Electoral de Españois Residentes no Estranxeiro (CERA), onde están inscritas aquelas persoas de nacionalidade española que residen fóra do Estado español. Malia carecer de datos ou proxeccións sobre o número final de sufraxios procedentes do CERA, non sería descartábel que o reparto de escanos nalgunha das circunscrición galegas se poida ver alterado por este continxente de sufraxios. Un total de 2.2.688.532 persoas están chamadas a votar na Galiza nas eleccións de 23 de xullo de 2023. Segundo os datos ofrecidos polo INE, 2.216.525 delas están incluídas no denominado Censo Electoral de Españoles Residentes en España (CER), que incorpora 922.326 electores na Coruña, 268.630 en Lugo, 252.844 en Ourense e 772.725 en Pontevedra. Outras 472.007 persoas fan parte do CERA, que representa 17,2% do total do corpo electoral galego. Arxentina, Cuba, Brasil e Uruguai suman 61,3% dos electores do censo de residentes ausentes. Nestes catro Estados, atópanse 289.530 persoas con dereito a voto nas circunscricións galegas para as eleccións estatais de 23 de xullo. Son 164.168 na Arxentina, 47.070 en Cuba, 44.527 no Brasil e 33.765 no Uruguai. Neste sentido, o groso de persoas inscritas no CERA vive no continente americano, sumando en toda esta área un total de 357.476 cidadás e cidadáns.