A consulta vai ter lugar esta fin de semana e combinará a votación telemática e presencial, anunciaron esta segunda feira en conferencia de imprensa o portavoz e a viceportavoz de En Marea, Luís Villares e Ana Seijas, respectivamente.
A corrupción xeneralizada en que se acha instalado o PP e o uso por parte deste partido de institucións do Estado como a fiscalía son os argumentos que esgrimiu Villares na comparecencia para xustificar a moción.
Para os dirixentes da confluencia galega, esta iniciativa -formalmente do grupo confederal Unidos Podemos-En Comú Podem-En Marea- é unha "moción cidadá", polo que o lóxico é que se consulte a cidadanía sobre a súa pertinencia.
Durante esta semana, a confluencia chamará á mobilización da súa base social para garantir a maior participación posíbel na consulta, que se convoca baixo o lema xenérico de #DecideAMocion.
