Na xornada de debate transcorrida dentro do ciclo Parlamento Aberto, organizada polo BNG e á que asistiron profesionais do sector sanitario, a portavoz nacional do Bloque, Ana Pontón, acusou o presidente da Xunta da Galiza, Alberto Núñez Feixoo, de "imprudencia temeraria" por continuar recortando persoal e recursos sanitarios "en plena pandemia". Nese sentido, alertou de que se está a vivir un incremento de casos preocupante da Covid “e non podemos confiarnos nin baixar a garda”.
“O virus vai por diante dos Gobernos polo que toda prudencia é pouca", considerou a nacionalista, ao tempo que cualificou de "inexplicábel" que o Goberno de Feixoo “cometa a imprudencia temeraria" de recortar fondos e persoal en sanidade no medio dunha pandemia, e concretamente en Atención Primaria, "a punta de lanza na loita contra a Covid-19".
Pontón criticou que o Goberno de Feixoo non utilice os fondos extraordinarios do Estado español e da Unión Europea para "fortalecer a sanidade pública" destinando “só unha parte residual” deles a este ámbito. Nos orzamentos para o ano 2022, subliñou, só se dedica 12% a Atención Primaria, “o que nos coloca na cola de todo o Estado, non só non nos aproximamos ao 25% recomendado en todos os estudos, senón que nos afastamos desta cifra", denunciou Pontón.
Por iso, a nacionalista urxiu unha "auténtica aposta pola Atención Primaria” e pediu “rescatala do colapso en que se atopa". O orzamento para Primaria para 2022, incidiu, é máis baixo que o do ano anterior, "dous millóns de euros menos e 47 menos que no ano 2009”.
A portavoz nacionalista tamén aludiu á elevada carga de traballo do persoal sanitario cos traballos para a inxección da terceira dose da Covid-19 e a vacina da gripe, o que fai necesario o mantemento de 100% do persoal contratado durante a pandemia porque si falla a Atención Primaria, "o fallo esténdese a todo o sistema", aseverou.
Aos recortes económicos, Pontón sumou o cambio de modelo que colide cos catro criterios básicos da Atención Primaria, "a proximidade, accesibilidade, relación directa entre profesionais e doentes e a continuidade na asistencia" e culpabilizou do deterioro da Primaria as decisión políticas da Xunta, unha política, dixo, baseada "no desmantelamento da sanidade pública" con "12 anos continuados de xubilacións das e dos profesionais sen proceder á súa substitución, contratacións precarias, 12 anos de recortes de recursos económicos, 12 anos de desmantelamento das estruturas directivas, 12 anos negándose a incorporar novos profesionais para garantir unha atención sanitaria integral" e, sobre todo, "12 anos de soberbia sen escoitar as e os profesionais que denuncian esta situación, e que exixen poder traballar en condicións dignas", relatou Pontón.
“Constatamos como facultativos dos Puntos de Atención Continuada (PAC) mobilizábanse desde hai semanas para denunciar sobrecarga horaria e o abuso, Colexios de Médicos que teñen presentado denuncias polo risco que supón a sobrecarga asistencial e o anuncio do recurso contra o seu sistema de xestión de demanda XIDE·, explicou a nacionalista.
A situación, remarcou, "é grave, pon en risco a saúde das persoas e é unha falta de respecto a todas e todos os profesionais da sanidade" que nos trasladan a sensación de abandono que senten. Mentres isto acontece, dixo, o "PP e aproveita a pandemia para acelerar a súa política de deterioro da sanidade pública, e os orzamentos para o ano 2022 son un claro exemplo".
Fortalecer a Atención Primaria e a saúde mental
Pontón explicou que no Estado español hai 6 psicólogas e psicólogos clínicos por cada 100.000 habitantes, e na Galiza 3,5, "case a metade", e na Unión Europea 18. Pola contra, "a Galiza lidera o consumo de psicofármacos en España".
Os antidepresivos foron en 2017, nun contexto sen Covid-19, o segundo medicamento de maior crecemento na Galiza, arredor de 400.000 galegos e galegas tomaban tranquilizantes e pílulas para durmir e a diferencia do conxunto do Estado, "na Galiza aumentaron os problemas de saúde mental na infancia".
No ano 2019, "na Galiza había 7.020 persoas agardando por unha primeira consulta, case o dobre que en 2014". Neste ámbito, "na Galiza faltan orzamentos, medios, profesionais, e servizos", afirmou.
Tras dez anos de recortes do Goberno do PP, dixo Ana Pontón, “Feixoo anunciou o ano pasado, en plena campaña electoral, o Plan de Saúde Mental pos Covid-19, cunha dotación de 83 millóns de euros e a creación de 241 novas prazas de profesionais en catro anos que continúa sen ser executado”.
A portavoz nacionalista considerou necesario reverter a situación e normalizar a Primaria con 100% da presencialidade, limitar as consultas telefónicas, reabrir os consultorios fechados, aumentar o orzamento a 25% e incorporar categorías para descolapsar as lista de agarda.
“É preciso”, insistiu, “pór en marcha unha política contra a precariedade e explotación na contratación ofertando contratos dignos e estábeis, para evitar que profesionais marchen para a sanidade privada ou o estranxeiro; e no ámbito da saúde mental "dotar o servizo con 21 millóns de euros e iniciar un estudo para determinar os efectos da pandemia na saúde mental da poboación”.
