Última sesión plenaria no Pazo do Hórreo antes das vacacións de verán e, após coñecérense as conclusións do informe elaborado pola Axencia de Seguridade Ferroviaria europea sobre o accidente de Angrois, o portavoz parlamentar do BNG, Francisco Jorquera, solicitou a modificación da orde do día para incluír a creación dunha comisión de investigación sobre o acontecido o 24 de xullo de 2013 na curva da Grandeira.
O PP fixo unha proposición in boche para instar a aprobación dunha declaración institucional que requira un informe "incontrovertido" sobre o sinistro
O Bloque fíxoo co apoio dos grupos Mixto e de Alternativa Galega de Esquerda (AGE). Porén, máis unha vez --e van catro-- o grupo parlamentar do Partido Popular impediuno. Segundo o seu voceiro, Pedrou Puy, "témonos oposto e explicado por que esta Cámara non ten competencias". Desde o PP insisten en que ao Parlamento de Galiza non lle corresponde investigar sobre aqueles asuntos que non son competencia autonómica, neste caso o sistema ferroviario. Así as cousas, o Regulamento sinala que "o Pleno do Parlamento de Galicia, por proposta da Xunta, da Mesa, de dous grupos parlamentarios ou da quinta parte dos deputados membros da Cámara, poderá acordar a creación dunha Comisión de investigación sobre calquera asunto de interese público" (artigo 52.1). E existen precedentes, como a comisión de investigación após a catástrofe do Prestige, apoiada por Fraga.
En troca, Pedro Puy propuxo aos demais grupos parlamentares unha reunión para a elaboración dunha "declaración institucional" na que se inste á creación dun "informe técnico incontrovertido" sobre o sinistro da curva da Grandeira no que faleceron 81 persoas e 152 resultaron feridas.
Jorquera (BNG): "Se queren coñecer a verdade o mellor é investigar"
Desde a bancada da oposición o PP só atopou a complicidade do PSOE que, para alén de apoiar a creación dunha comisión de investigación, reclamou ao grupo parlamentar popular unha proposta de declaración para a valorar. Pola súa banda, o BNG rexeitou a proposta in voce [a viva voz]" solicitada e asegurou que para poder elaborar un "informe incontrovertido" requírese que existe unha "comisión de investigación incontrovertida" e "a CIAF non o é". "Se queren coñecer a verdade", acrecentou, "o mellor é investigar" e que as persoas responsábeis se sometan ao control do Parlamento de Galiza, insistiu Jorquera.
Tamén o voceiro de AGE, Antón Sánchez, rexeitou a proposta de Pedro Puy e criticou que "O PP vai a rastras" dos acontecementos propondo unha "declaración que non vale absolutamente para nada" mais que "para tapar as vergoñas do PP".
Sánchez (AGE): "A declaración non vale para nada"
Desde o Grupo Mixto, Consuelo Martínez, sinalou que a petición do PP "vén recoñecer que a investigación foi unha fraude" polo que urxiu crear a comisión de investigación.
Finalmente e, tras dúas votacións, cos votos en contra do PP (39) e a favor da oposición (33) a comisión foi rexeitada.