Na Galiza, por cada 100 persoas que están en idade de abandonar o mercado laboral contabilízanse 19 persoas que ingresan ao sistema da Seguridade Social. É un dos datos que achegou esta sexta feira o Instituto Galego de Estatística (IGE) sobre maio, un mes que rexistrou 1.011.490 de persoas afiliadas en alta laboral ao Sistema da Seguridade Social, 0,6% máis que o anterior
Na cifra interanual, o número de persoas afiliadas aumentou nos sete grandes concellos galegos. O maior incremento experimentárono os concellos de Santiago, Lugo e Ferrol, cun aumento de 2,9% no primeiro e de 2,8% nos outros dous.
Sobre a presenza de persoas estranxeiras, o IGE apunta que representan 5,6% e destacan en concellos próximos a Portugal, en Valdeorras e na Mariña.
Por sectores de actividade, os concellos cunha maior porcentaxe de traballadoras e traballadores afiliados no sector primario atópanse nas comarcas da Terra Chá, Xallas, Terra de Melide, Arzúa e Deza. En relación ás afiliacións no Réxime especial do mar, municipios como A Illa de Arousa (O Salnés), Camariñas (Terra de Soneira) ou Muxía (Fisterra) tamén presentan altas porcentaxes nese sector. A industria, pola súa parte, ten maior peso na área de Vigo e nas comarcas de Valdeorras, O Barbanza, Caldas e O Sar.
No que respecta á construción, sobresaen os municipios da zona da Costa da Morte (excepto Corcubión e Fisterra) con porcentaxes de afiliacións superiores á media galega (7,4%); en Cabana de Bergantiños, por exemplo, esta porcentaxe alcanza 18,3%. Outros que saen da media son Gomesende, en Terra de Celanova (19,1%) e Cabanas, no Eume (18,4%).
Por último, o sector servizos amosa un maior peso nos sete grandes concellos e nos seus municipios limítrofes. Cabe destacar os concellos de Santiago e da Coruña, onde máis de 85% das afiliacións existentes a finais de maio de 2024 correspondían a ese ámbito.
Especialización produtiva
Por especialización produtiva, o IGE indica que as comarcas de Ferrol e Vigo están especializadas na rama da fabricación de material de transporte e grandes reparacións industriais. Hai tres comarcas con especialización na enerxía, subministración de auga e xestión de residuos (Terra de Trives, Ordes e o Eume) e tres na industria agroalimentaria (O Ribeiro, O Barbanza e O Salnés).
Por último, na industria da madeira, papel e mobles sobresaen as de Terra de Montes, As Mariñas, Terra de Celanova e O Carballiño.