Así é a Galiza que fica após 19 meses de Presidencia de Alfonso Rueda

Alfonso Rueda asumiu a Presidencia da Xunta da Galiza o 14 de maio do ano pasado. "Son un fillo de Galiza ao que Galiza encomenda que manteña o seu progreso e o seu benestar", afirmara no acto oficial de toma de posesión do cargo, ante máis de 500 persoas convidadas. Desde aquela pasaron 19 meses e cando decorran as eleccións galegas, adiantadas ao 18 de febreiro, aproximarase aos dous anos de mandato. Un balanzo destes meses de Executivo dirixido por Rueda con datos en sanidade, educación, autogoberno ou dependencia, mostran como se acentúa a tendencia dos 12 anos anteriores dos Gobernos do PP, nunha liña diferente ao "progreso e benestar" que prometía o novo presidente. Sanidade Así, en sanidade, desde que o novo presidente tomou o cargo até xullo deste ano —últimos datos oficiais—, as listas de espera aumentaron en 640 persoas. En 12 meses esa lista para ser operado foi engordando a unha media de case dúas persoas cada día. En paralelo, ao longo destes meses foi aumentando a protesta e mobilización social ao redor da situación da Atención Primaria: Soutomaior, Moaña ou A Fonsagrada son só tres exemplos de concellos onde decorren importantes mobilizacións veciñais en defensa da sanidade pública. Rueda báixase da moto e sobe a un autobús cheo de chiscadelas á extrema dereita Os orzamentos de 2024, os primeiros elaborados desde o inicio con Rueda como presidente, contemplan un investimento real en Atención Primaria 327 millóns de euros inferior ao de 2009. Eses mesmos presupostos dedican seis millóns máis aos concertos con hospitais privados, a falta de concretar a contía destinada ao hospital vigués de Povisa, que recibe a cantidade máis elevada neste concepto. Non é esta a única partida que aumenta en sanidade, tamén o fai a que vai ao gasto en capeláns para os hospitais públicos: 770.000 euros en 2024. Dependencia Nestes 18 meses non houbo ningunha nova residencia pública, ao igual que nos anteriores 12 anos de Gobernos do PP. Mais si que houbo unha novidade: as dúas residencias doadas por Amancio Ortega —en Compostela e Lugo—. Rueda optou por privatizar a xestión de ambas as dúas por 11 millóns de euros durante dous anos. Os propios datos da Administración cifran en 5.000 as camas dispoñíbeis en centros públicos. Nos privados hai case 17.000 prazas. Alfonso Rueda adianta as eleccións ao 18 de febreiro e a campaña será no Entroido: "É sorprendente, que procura o PP con isto?" A Galiza fechou 2022 cun total de 409 residencias de maiores, das que só 20% son públicas (90 centros). No que respecta a centros de día, so catro de cada 10 son de carácter público. Ensino A conflitividade na educación aumentou neste curso, con mobilizacións de docentes do ensino público non universitario ou do persoal das escolas infantís da etapa de 0 a 3 anos. Aos feches de colexios nestes anos , ratios altas, horario lectivo que é o máis alto do Estado ou orzamentos escasos (o presuposto real do ensino cae en 150 millóns para o ano 2024); súmase a "falta de vontade diálogo" por parte dos responsábeis da Consellaría que denuncian representantes do profesorado ou ANPAS. Foi este Goberno galego presidido por Rueda quen aprobou reservar máis de 1.900 millóns de euros até 2029 para a educación concertada. Cada ano destinaranse como máximo 317 millóns a estes contratos. Ademais, Educación gastará 29 millóns de euros en 2024 en aulas de relixión. ENQUISA | Quen chega mellor ás eleccións do 18 de febreiro? Sectores produtivos Diferentes sectores produtivos rexistraron ao longo deste período unha contracción tanto en emprego como en capacidade produtiva. A industria galega sufriu un declive de 2% no primeiro ano de Goberno de Alfonso Rueda, mentres nese mesmo exercicio a actividade fabril creceu 3% no Estado. Cando Alfonso Rueda tomou posesión como titular da Xunta, na Galiza había 168.400 empregos no sector industrial. Un ano despois perdéronse 1.200 deses postos de traballo (-0,7%), o que supón que cada día que pasaba había tres empregos industriais menos. Un suma e segue aos anos anteriores. O complexo industrial galego destruíu 39.400 empregos nos últimos 15 anos. Tamén o comercio galego perde músculo e trata de defenderse da actual crise. 6.350 comercios están fechados na Galiza, segundo os cálculos da Federación Galega de Empresas Inmobiliarias (Fegein). Máis de 1.200 profesionais do sector do comercio perderon o emprego ao longo de 2023, segundo a Unión de Profesionais e Traballadores Autónomos (UPTA). Rueda fecha a porta á petición do CES dunha empresa de enerxía "pública" Tampouco os sectores primarios están en situación de mellora. 43 colectivos culparon este mes a Xunta do "devalo produtivo" da ría de Arousa, que perdeu en 2022 dous terzos da produción de ameixa. Unha mortaldade de bivalvos que tamén se dá noutras rías e que apunta a un futuro máis que negro a un dos alicerces dos sector do mar. No último lustro a frota pesqueira galega perdeu 208 barcos. No agro, máis de 1.590 explotacións gandeiras fecharon durante o ano 2022. E o leite galego segue a ser, en novembro de 2023, o peor remunerado do Estado: 47 céntimos por litro. As familias que 'malchegan' a fin de mes aumentan 17% Hai ano e medio, cando Rueda asumía a Presidencia da Xunta da Galiza após a marcha de Alberto Núñez Feixoo a Madrid, 51% das familias galegas chegaban a final de mes "con facilidade" ou "moita facilidade". Mais iso foi hai ano e medio. Agora, esa porcentaxe caeu a 46% e os fogares do país onde rematar o mes é unha odisea representan 7 puntos máis: 54%. Agora hai 540.000 familias para as que rematar o mes é unha batalla case que diaria na que cada euro conta. Son 53,7% do millón de fogares galegos. A maioría. Sete puntos máis que aqueles que din que rematan o mes con "facilidade" ou "moita facilidade". Dese millón de familias, 8% —ao redor de 80.000— afirman que chegan a fin de mes "con moita dificultade", 30.000 máis que hai 12 meses; e 46% chegan "con dificultade", 460.000. Cambio de tornas Cambiaron as tornas. No terceiro trimestre de 2022, inaugurando Rueda o seu periplo á fronte do Executivo, os fogares que aseguraban que acabar o mes non lles supuña dificultade eran máis de medio millón, cifra que agora caeu a pouco máis de 460.000. Entre aquel trimestre e este aumentou en 10% o número de fogares que dificilmente acaban o mes.