O Consello Nacional do BNG, reunido este sábado, valorou positivamente o proceso de asembleas abertas que comezou ao remate do verán e anunciou que BNG-Asembleas Abertas esa será a denominación que utilizará, xunto ás súas siglas, nas eleccións municipais de maio de 2015.
“Decidimos elaborar o programa e as candidaturas a partir das propostas que saían das asembleas abertas e concorrer ás eleccións de maio coa denominación BNG-Asembleas Abertas”, informa a organización nacionalista, que afirma tamén que “quere así enviar unha mensaxe inequívoca da súa aposta por integrar a toda a cidadanía rebelde, sen pedir carné a ninguén, que quere participar directamente na política dos seus concellos, que aposta por un proxecto nacionalista e transformador para o conxunto de Galiza e ve no BNG a ferramenta política máis acaída para implantalo, e que ve nos comicios municipais a primeira oportunidade para derrotar os partidos políticos que sosteñen un réxime corrupto, que empobrece a maioría social e nega o dereito dos pobos a decidir o seu futuro”.
A finais de novembro saberanse @s candidat@s da organización, que antes formará grupos de traballo abertos
![Publicidade 201821]()
O BNG promoverá outra fase de asembleas abertas con “grupos de traballo concretos no que os e as participantes no proceso poden presentar propostas e nomes de cara a elaboración do programa e das candidaturas”, que se marcan o 29 de novembro como a data para seren aprobadas.
