Edís do Partido Socialista e do Partido Popular definiron esta cuarta feira o novo Goberno municipal do Carballiño tras o pacto alcanzado para a gobernabilidade desta localidade da comarca homónima.
O acordo, que contempla que até abril de 2026 ostentará a alcaldía o socialista Francisco Fumega para despois pasar a mans do PP, recolle que os seis concelleiros e concelleiras socialistas e as cinco populares terán áreas definidas.
En concreto, o alcalde será o responsábel das competencias de Economía, Facenda, Orzamentos e Administración Xeral; mentres que o portavoz popular e tenente de alcalde, José Rafael Castro, será o edil de Urbanismo, Contratación Administrativa e Deportes.
A Concellaría de Persoal, Seguridade, Emerxencias, Mobilidade e Réxime Interior será responsabilidade do socialista Alberto Otero; mentres que Cultura correrá a cargo do tamén socialista Diego Fernández.
Ademais, Servizos Sociais e Sanidade terá como edil a Silvia Varanda (PSdeG), mentres que a popular Elvira Torres será a encargada de Medio Ambiente e Termalismo. Pola súa parte, Rosas Fontes (PSdeG) levará a área de Servizos Públicos e Benestar Comunitario, mentres que o popular Miguel Fernández encargarase de Medio Rural.
Diana González (PP) será a concelleira de Emprego, Comercio e Mocidade e a tamén popular Lorena Castro levará Promoción Social e Educación. Para finalizar o reparto de carteiras, Manuel Dacal (PSdeG) encargarase de Turismo e Industria.
Tras coñecerse o acordo alcanzado entre o grupo municipal socialista e o PP do Carballiño, o secretario xeral do PSdeG, José Ramón Gómez Besteiro, informou de que se procedería a abrir un expediente aos concelleiros e concelleiras tendo en conta que, segundo sinalou, o Partido Socialista "non goberna" co PP. "Somos a alternativa ao PP", concluíu.
