O Partido Popular apostou esta quinta feira a súa aposta por profundar na internacionalización dos viños galegos coa axuda de Europa a partir do 9 de xuño na medida en que o sector viticultor e os seus produtos contribúen a crear "marca Galiza" en todo o mundo.
Así o afirmou a formación nunha visita á Adega Cachín na Teixeira (Terra de Caldelas), na que a secretaria xeral do PP na Galiza, Paula Prado, o candidato Adrián Vázquez e a secretaria da xestora do PP de Ourense, Sandra Quintas, contaron co propietario das instalacións, César Enríquez Diéguez, como anfitrión e guía dunha mostra do proceso de produción.
Adrián Vázquez resaltou a "heroicidade" do traballo dos viticultores da Ribeira Sacra e a súa contribución para facer non só que a Galiza conte "cos mellores viños", senón que "sexa coñecida en toda Europa e no mundo pola calidade dos seus produtos".
"Cada vez é máis difícil competir nun mercado globalizado debido aos altos custos e por iso comprometémonos cos viticultores galegos a facer nosas as súas demandas e trasladalas a Bruxelas", remarcou.
Chamamento
En clave electoral e a dous días do 9 de xuño, Adrián Vázquez remarcou que "estas non son unhas eleccións europeas" simplemente, senón que está en xogo "poder seguir axudando ao sector primario". Por iso, fixo un chamamento a que os galegos e as galegas expresen nas urnas unha resposta coa que "a súa mensaxe se escoite alto e claro".
"Non queremos máis sanchismo, non queremos máis muros entre españois e europeos. O que queremos é seguir traballando por unha Unión Europea libre e aberta onde calquera que queira, poida desenvolver o seu proxecto de vida en liberdade", concluíu.
