Xubilacións e baixas "que non se cobren": carteiras rurais advirten que o persoal non pode garantir o servizo

O rural galego ten un dereito constitucional menos que o resto do país. As carteiras e os carteiros rurais (1.000 segundo Correos en 2022 e perto de 800 segundo os sindicatos) levan meses protestando polo mal dimensionamento dos cadros de persoal e a carga de traballo á que están obrigados a facer fronte no día a día. A Constitución española e a Lei Postal do Estado recoñecen a todas as cidadás e cidadáns o dereito a un servizo postal universal cinco días á semana. Segundo denuncian os sindicatos, no rural galego, Correos leva anos sen cubrir baixas e xubilacións, e facendo que cadros de persoal cada vez máis reducidos asuman os postos que a empresa pública vai “amortizando”. Un exemplo desta situación é a Comarca do Deza, onde o persoal leva meses manifestándose co apoio da CIG (mesmo nas xefaturas de Lugo, Pontevedra e Santiago) denunciando a falta de efectivos para o reparto postal nos concellos de Lalín, Agolada, Dozón e Rodeiro. Cun cadro “mal dimensionado e minguado por xubilacións e baixas que non se cobren”, segundo denuncia a Nós Diario o carteiro de Lalín Rafael Iglesias, atenden unha poboación de máis de 30.000 habitantes “no rural, coa poboación dispersa e cunha carga de traballo brutal”. Iglesias explica que cada un dos carteiros rurais da zona “temos recoñecidos 82 quilómetros ao día, pero coas recargas andamos todos por máis de 100 quilómetros diarios”. En total, este servizo de Lalín acumula “unha ruta de 1.400 quilómetros todas as mañás”. No caso do Deza, o servizo postal ten a maiores a carga de traballo relativa ás numerosas explotacións gandeiras desta zona, principal produtora no sector primario galego, co que iso supón tamén en certificados e papelame que Correos xestiona, “cun cadro de persoal sobrecargado, atendendo unha poboación dispersa, con pistas e estradas en mal estado e mesmo usando os seus propios vehículos”. Son moitos meses de protesta no caso de Lalín, extrapolábel á meirande parte do rural galego. O persoal de Correos agradece a axuda da CIG para levar a cabo accións en distintos puntos do territorio, e para ser "o altofalante para as súas demandas", que a empresa pública segue sen atender na nova planificación aprobada no Consello de Ministras e Ministras este ano. A resposta das carteiras rurais ten tamén o mérito de que, conscientes da importancia do seu servizo para o rural, aproveitan os seus 20 minutos libres ao día para o café (entre as 9 e as 9.20 horas da mañá) e as tardes, para mobilizarse e manifestar as súas reivindicacións nas rúas e prazas dos concellos. Últimas horas para solicitar o voto por correo nas europeas En contrapartida a este acto de "responsabilidade co seu papel social e coa veciñanza", só recibiron até o de agora da empresa pública “ameazas e advertencias de que nos teñen xeolocalizados polas nosas PDA, unha presión psicolóxica que exercen con métodos do Gran Irmán”. Estes controis veñen do Goberno español aplicando directivas da Unión Europea, e os traballadores explican que chegou ao sen sentido de que “queren aplicar algoritmos e intelixencia artificial para calcularnos as distancias e o tempo de cobertura dos servizos”. Denuncia Rafael Iglesias que “como non coñecen o noso país, non saben que imos por pistas sen asfaltar até granxas, moitas veces parando no camiño para deixar pasar vacas, ou agardando para que unha persoa maior vaia buscar o seu DNI para tramitar os envíos”. Explican os carteiros que fan este esencial servizo no rural galego que “non nos poden cronometrar, non coñecen o país”. A carga de traballo deste colectivo leva tamén perto dun ano tensionada polas distintas convocatorias electorais e o incremento do servizo que iso supón. Eleccións municipais o 28 de maio de 2023; aos dous meses estatais en xullo; a seguir, en febreiro de 2024, eleccións galegas; e agora, o vindeiro 9 de xuño, as europeas. Todos estes procesos supoñen para os servizos de correos un traballo a maiores na entrega de tarxetas censuais, publicidade electoral e a xestión do voto por correo. A resposta da empresa nestes casos é, segundo denuncia Iglesias, “só contratar para uns días persoal eventual”. Correos en cifras no rural Segundo os últimos datos facilitados pola propia empresa ao Parlamento galego, no rural galego exercen como carteiras arredor de 1.000 persoas. Contan con 166 oficinas postais e 138 unidades de reparto ás que se suman para dar servizo ao rural da Galiza un total de 160 puntos de atención. Correos presume ademais de datos de feminización do seu persoal, asegurando que 6 de cada 10 persoas empregadas son mulleres. Estes son os datos da empresa, pero segundo o persoal, os traballadores e traballadoras de Correos no rural galego levan moito tempo protestando pola carga de traballo “inasumíbel” que levan a cabo cada día, e critican que a empresa “non cubre as baixas”, denunciando mesmo “presión psicolóxica” nas súas xornadas laborais. "Feixoo converteu correos nunha S.A. lista para privatizar o servizo" Rafael Iglesias ten 62 anos e leva 37 como carteiro rural nas parroquias de Lalín, Dozón e Rodeiro. Neste tempo ten visto pasar moitas direccións políticas da empresa pública, o último cambio logo das eleccións estatais de xullo 2023. Tamén fala de que o ex presidente da Xunta e actual líder do PP, Alberto Núñez Feixóo, que foi presidente de Correos, “presume moito do que modernizou a empresa e non ten vergoña. Converteu Correos nunha Sociedade Anónima lista para privatizar”, o mesmo que ocorreu en Arxentina e, recentemente, en Israel. A dirección política da empresa fala de desastre económico e un descenso dos ingresos pola mingua nos envíos postais, pero o persoal que todos os días sae á rúa a repartir o correo, argumentan que “aumentaron as certificacións e os envíos postais. As contas non saen”, explica a Nós Diario persoal de Correos.