ANÁLISE | A batalla electoral remata na Galiza cun empate entre o PP e a suma do PSdeG e do BNG

A primeira batalla electoral após os comicios galegos concluíu cun empate entre o Partido Popular e o pólo conformado polo Partido dos Socialistas de Galicia e o Bloque Nacionalista Galego. Se na cita electoral de febreiro os populares lograron 47,3% dos sufraxios e a suma de nacionalistas e socialistas ficou en 45,4%, na convocatoria do domingo o partido liderado na Galiza por Alfonso Rueda alcanzou 43,6% dos votos fronte a 43,1% das formacións dirixidas por José Ramón Gómez Besteiro e Ana Pontón. Os resultados electorais non son extrapolábeis entre procesos distintos. A lóxica do electorado opera de forma diferente en función do carácter da convocatoria, rexistrándose un comportamento dual na Galiza, que tamén se observa en Catalunya ou en Euskadi, atendendo ao ámbito da cita. Porén, os comicios definen tendencias máis alá da conxuntura concreta, permiten coñecer o estado de opinión da cidadanía sobre o momento político e dan conta das fortalezas e debilidades das organizacións que concorren ao proceso. O Partido Popular está satisfeito dos resultados alcanzados pero agardaba máis. Nesta liña, significa o seu avance de máis de 13 puntos en relación cos comicios europeos de 2019, desenvolvidos nun momento moi difícil para a formación, cun PSOE á alza, coincidindo na mesma cita cuns comicios locais onde ficaron en mínimos históricos e cun Ciudadanos que alcanzaba 6,6% dos sufraxios e que o domingo ficaba en 0,2%, unha cifra que o sitúa por baixo do Partido Animalista co Medio Ambiente (Pacma). Os populares fican lonxe das súas expectativas iniciais. A este respecto, os dirixentes galegos da formación consultados por Nós Diario consideran que non foi acertada a táctica do equipo de Alberto Núñez Feixoo de presentar estes comicios como un referendo sobre a política de Pedro Sánchez. Na mesma dirección, a campaña serviu para evidenciar a fenda cada vez máis evidente entre Núñez Feixoo e Alfonso Rueda, que busca marcar distancias co legado do seu antecesor e gañar peso dentro do partido a nivel estatal marcando un perfil propio. O PP obtén un mal resultado en Vigo, a cidade máis poboada da Galiza: estes son os municipios onde non gañou o Partido Popular O Partido dos Socialistas de Galicia respira. Malia que a formación caeu oito puntos en relación cos comicios de 2019, a dirección da organización celebra situarse no 27% dos sufraxios e superar de forma folgada o BNG. Nesta liña, fontes da mesma comentan a Nós Diario que agardan que as eleccións de antonte signifiquen un punto de inflexión na tendencia á baixa da formación socialista comezada nas eleccións galegas de xullo de 2020. Pedro Sánchez O efecto Sánchez chegou á Galiza. Porén, está por ver cal é o seu alcance máis alá deste proceso electoral, nunha formación que ten por diante un calendario moi complicado na esfera externa e interna. Así, na primeira das frontes, debe clarificarse en relación de temas como a celulosa que Altri proxecta na Ulloa, algo que lle están demandando amplos sectores do partido. Ao tempo, Besteiro ten por diante un duro traballo de unir o partido e reforzar o seu liderado, diante dunha organización que continúa en mans dos baróns territoriais. O antigo secretario xeral da formación, Gonzalo Caballero, criticou esta segunda feira os resultados obtidos e reclamou un cambio de rumbo. O Bloque Nacionalista Galego dáse por satisfeito. A formación nacionalista partía co obxectivo de lograr un escano para Ana Miranda e consegue a representación no Parlamento Europeo, tras alcanzar 16,1% dos sufraxios e sumar 4,3 puntos máis que nos comicios de 2019. A este respecto, fontes da dirección do BNG consultadas por Nós Diario apuntan a que a campaña desenvolveuse nun contexto moi complicado para as súas aspiracións, pola polarización entre o PP e o PSOE e a dificultade para introducir o seu discurso nun proceso marcado por unha dialéctica estatal. O BNG non quere recoñecer que o seu escano estivo en risco durante a campaña pero esa foi unha posibilidade presente até a propia noite electoral onde as sondaxes abrían a porta a esa opción. Nese sentido, desde a dirección nacionalista queren mirar cara ao futuro, partindo da consideración de que os resultados do domingo deixan o BNG nunha boa posición para as próximas citas electorais. A batalla no espazo ultraespañolista resolveuse a favor de Vox. Mentres a formación liderada por Santiago Abascal alcanzou 4,3% dos votos, 1,7 máis que nos comicios de 2019, a plataforma impulsada polo comunicador de extrema dereita Alvise Pérez, Se acabó la fiesta, situouse no 2%. Neste sentido, a porcentaxe de sufraxios destas formacións na Galiza está 7,6 puntos por baixo da media do Estado. Sumar e Podemos Sumar e Podemos remataron a contenda en empate técnico. Neste sentido, a primeira formación colocouse no 2% dos votos e a segunda logrou 1,9% . Os resultados, que representan un duro golpe para Sumar e para un dos seus parceiros, Izquierda Unida, que fica por primeira vez fóra do Parlamento Europeo, provocaron a dimisión de Yolanda Díaz como máxima responsábel de Sumar. Yolanda Díaz dimite como líder de Sumar Miranda, Millán Mon e Casares revalidan escano en Bruxelas O Parlamento Europeo volverá contar coa presenza de dous galegos e unha galega. Un deles, o popular Francisco Millán Mon, cumprirá nesta lexislatura 24 anos na Eurocámara, a onde chegou en 2004 co apoio do seu cuñado e patrocinador, Mariano Raxoi Brei. O outro, o socialista Nicolás González Casares, sumará o seu segundo mandato, moi reforzado internamente, até o punto de promovelo algunhas familias do PSOE como posíbel sucesor de Gómez Besteiro. A terceira galega na Cámara da UE é a nacionalista Ana Miranda Paz, outra veterana no Parlamento Europeo que ocupará escano por cuarta ocasión. O novo período de sesións agárdase moi intenso. O mesmo estará marcado polas novas políticas económicas que vai aplicar a Comisión Europea no marco do retorno ás regras fiscais marcadas polo Pacto de Estabilidade e Crecemento. Na mesma dirección, destacará o debate sobre o programa Next Generation, coa súa derivada galega asociada á factoría de Altri en Palas de Rei, na comar da Ulloa. Outra cuestión chave será a discusión sobre o novo marco enerxético, particularmente no referido ao despregamento da eólica terrestre e mais mariña, así como o desenvolvemento dos proxectos para o hidróxeno verde. Francisco Millán Mon, Ana Miranda e Nicolás González Casares: así é a representación galega no Parlamento Europeo